साहो'चे तीन तास 'बाप्पा'ला द्या !

एका वाक्यात सांगायचं तर हा फक्त चोर-पोलीसचा खेळ आहे. आता जे हुशार आहेत त्यांना कोण चोर, कोण पोलीस हे पहिल्या काही मिनिटांमध्येच कळू शकेल त्यासाठी मध्यंतरापर्यंत वाट पाहण्याची अजिबात आवश्यक्ता नाही. मुळात हे सगळं कशासाठी चालू आहे, हा मनुष्य असा का वागतोय, असाही घडू शकतं का, हे इतक्या कमी वेळात कस शक्य आहे असे एक ना अनेक प्रश्न या तीन तासात पडतात. पण त्याची उत्तर काही केल्या तुम्हाला मिळणार नाहीत कारण साहो हा सामान्य माणूस नसून तो असामान्य मसिहा आहे. असं म्हणा ना तो २०१९ मधला सुपरमॅनच आहे. त्यामुळे कोणतेही प्रश्न उपस्थित न करता हा चित्रपट सहन करणे एवढेच आपण करू शकतो. साहो बघताना गेल्या वर्षी आलेल्या सलमानच्या रेस ३ ची सातत्याने आठवण झाल्याशिवाय राहात नाही. बऱ्याच गोष्टींचं साधर्म्य यामध्ये जाणवतं. बाकी फार काही या चित्रपटाबाबत बोलण्यासारखं नाहीये. कारण यात ठोस असं काही घडतच नाही. प्रभासचा अभिनय तेवढा त्यातल्या त्यात चांगला आहे, त्याच्यानंतर मुरली शर्मा जास्त लक्षात राहतो. बाकी श्रद्धा सहीत सगळेच मोठे कलाकार आपले अस्तित्व प्रेक्षकांच्या मनात बिंबविण्यात यशस्वी झालेले नाहीत. आता अखेरीस निर्णय तुमच्या हातात आहे. प्रभासच्या प्रेमापोटी काही रसिक 'साहो'कडे आकर्षित होतीलही पण चित्रपटगृहातून बाहेर पडल्यावर मात्र त्यांची अस्वस्थता बघण्यासारखी असेल!