किशोरीताईंच्या पाऊलांवर पाऊल ठेऊ पाहणारी आर्या कंठाने नाही तर आत्म्याने गाते असे म्हटल्यास वावगं ठरणार नाही. तिच्या गायकीतील रागाची उपज, सौंदर्यपूर्ण स्वरलगाव, मींडकाम, गमकप्रकार, तानांची आकारयुक्त मांडणी ऐकताना, श्रोत्याला एका सुंदर भावविश्वाचा अनुभव होतोच, मात्र काहींना साक्षात विठ्ठलाचे दर्शनच घडत असावे!
स्वर, शब्द, भाव आणि लय या सर्वांचे संतुलन राखून आर्या अंबेकर तिच्या या गाण्यातून तिचे स्वरसामर्थ्य ही उत्तम दर्शवते. हे तिचे किशोरीताईंसाठीचे समर्पण, ऐकणाऱ्याला बोटांनी ताल धरू लावते, चेहऱ्यावर एक समाधानाचे हास्य देऊ जाते आणि वारंवार त्या दिव्य स्वरांचा लाभ घेण्यास भाग पाडते.
किशोरीताईंबद्दल वाचत असताना एक गोष्ट पक्की लक्षात आली, ती म्हणजे अशी की एखाद्याने चिकित्सक वृत्तीने कोणत्याही विषयाचा अभ्यास केला, तर त्यात प्रभुत्व तर आपोआप मिळते, सोबतच आत्मविश्वासही जागृत होतो. पूर्वसूरींच्या गायकीमधील सौंदर्यस्थळांची तत्वे अंतर्भूत करत, आर्याही स्वतःची वेगळी अशी गायनशैली निर्माण करण्याच्या वाटेवर आहे.
सोबतच आजकालच्या तरुणांना परिणामशून्य गाण्यांपेक्षा अभंग, भजन, ठुमरी, दादरा यासारख्या अमूल्य संगीत साठ्याची ओळख करून देऊन आर्या अस्सल कौशल्य करत असल्याचे जाणवते. प्रतिभासंपन्न, गुणसंपन्न असलेल्या या गानसाधिकेने यशस्वी स्वनिर्मित गायनशैलीने संगीतक्षेत्रात संपन्नतेचे योगदान कायम देत राहावे!